རྒྱལ་བས་བསྔགས་པའི་མདོ་ཁམས་སྨད་ལྗོངས་འདིར།
འགྲོ་མགོན་འཕགས་པ་བློ་གྲོས་རྒྱ་མཚོ་ཡིས།
ཞབས་ཀྱིས་བཅག་ཞིང་བྱིན་གྱིས་བརླབས་པའི་གནས།
རིགས་གསུམ་སྒྱུ་འཕྲུལ་ས་སྐྱའི་གངས་རི་ལས།།།
ལེགས་འོང་ཟབ་ཆོས་རྒྱུན་ལ་ལོངས་སྤྱོད་པའི།
གནས་མཆོག་སྒང་མཛེས་དགོན་འདི་ཨེ་མ་རྨད།
ཕྱི་ལྟར་སྤྱོད་ལམ་རྣམ་བཞི་ལེགས་པར་གཅེས།
ནང་ལྟར་བྱང་ཆུབ་སེམས་ཀྱི་རྒྱུད་ཕྱུག་པའི།
སྤྲུལ་པ་མངའ་བརྙེས་གྲུབ་ཐོབ་སྤུན་བདུན་དང་།
མཁས་གྲུབ་ལྡན་པའི་མཁན་སྤྲུལ་རྣམ་པ་ཚོ།
མང་ཐོས་སྡོམ་བརྩོན་རྒྱ་མཚོའི་བླ་གྲྭ་རྣམས།
ལེགས་པར་བསྐྲུན་པའི་སྒང་མཛེས་དགོན་འདི་རྨད།
ཀ་ཁ་གནས་ལ་བརྩོན་པའི་རིག་གནས་གླིང་།
མདོ་རྒྱུད་འཆད་ཉན་སྤེལ་བའི་བཤད་སྒྲུབ་གླིང་།
བསྙེན་སྒྲུབ་ལས་ལ་སྦྱོར་བའི་བསམ་གཏན་གླིང་།
དུས་མཆོད་སྒྲུབ་པ་ཚོགས་པའི་འཕེལ་རྒྱས་གླིང་།
འདི་ཕྱིའི་སྡིག་སྒྲིབ་སྦྱང་བྱེད་ཆོས་འཁོར་གླིང་།
གླིང་ལྔ་ལྡན་པའི་སྒང་མཛེས་དགོན་འདི་རྨད།
ནེ་གསིང་གཡུ་ཡི་མཎྜལ་བཀོད་འདྲའི་སྟེང་།
མཚོ་དང་ཚེ་འུ་ལྷ་བྱས་གསུང་སྙན་སྒྲོགས།
དཀར་དམར་མེ་ཏོག་གཡུ་སྦྲང་བུང་བ་ལྡིར།
མཛེས་པའི་གངས་ཅན་བུ་དང་བུ་མོ་ཡིས།
དགའ་སྤྲོ་སྐྱིད་གླུའི་འདོད་ཡོན་དཔལ་ལ་རོལ།
ཡུལ་སྐྱིད་སྒང་མཛེས་དགོན་འདི་ཨེ་མ་རྨད།
དཔལ་ལྡན་བླ་མ་རྣམས་ཀྱི་གཟི་བྱིན་གཅིག
ཆོས་སྐྱོང་དཔལ་ལྡན་ལྷ་མོའི་ནུས་མཐུ་གཉིས
སྒང་མཛེས་བླ་གྲྭ་ཡོངས་ཀྱི་དཀའ་ངལ་གསུམ།
དད་ལྡན་སྦྱིན་པའི་བདག་པོའི་འབྲེལ་བཟང་བཞི།
བཀྲ་ཤིས་བརྩེ་ཆེན་ལྷ་ཁང་ལེགས་གྲུབ་འདིར།
དགོན་སྡེ་ལྷན་དུ་འཛོམས་པའི་དུས་འདི་རྨད།།
བླ་མའི་སྐུ་ཚེ་རབ་ཏུ་བརྟན་གྱུར་ནས།
དགེ་འདུན་ཐུགས་མཐུན་ཁྲིམས་གཙང་རབ་རྒྱས་ཞིང་།
སྦྱིན་བདག་ཚེ་བསོད་དཔལ་འབྱོར་མངའ་ཐང་རྒྱས།
ཆར་ཆུ་དུས་འབེབས་ལོ་ཕྱུགས་རྟག་ལེགས་ཞིང་།
མི་ནད་ཕྱུགས་ནད་དུས་འཁྲུགས་རྒྱུན་ཆད་ནས།
བདེ་སྐྱིད་བསྐལ་བཟང་མྱུར་དུ་འཆར་བར་སྨོན།།
ཅེས་པ་སྒང་མཛེས་དགོན་པའི་མཁན་མིང་འཛིན་པ་
ཐུབ་བསྟན་ཚུལ་ཁྲིམས་འོད་ཟེར་ནས།
རབ་བྱུང་༡༧པའི་མེ་སྤྲེལ་ལོའི་བོད་ཟླ་༧པའི་ཚེས་༡༡ཉིན་
བརྩེ་ཆེན་ལྷ་ཁང་ཆེན་མོ་མཛད་སྒོའི་རྗེས་དྲན་ཚུལ་དུ་
ཕུལ་བས་དགེ་ཞིང་ཤིས་པར་གྱུར་ཅིག་གུ།